ၶွမ်ႇပၼီႇ သဵၼ်ႈမၢႆလမ် (ၸိုဝ်ႈၼဝ်ႈ)

ၶွမ်ႇပၼီႇ IGE Power Co. Ltd. ၼႆႉပဵၼ်ၵိင်ႇၽႄၶွမ်ႇပၼီႇ International Group of Entrepreneurs (IGE Group) ဢၼ်ပဵၼ်ၶွမ်ႇပၼီႇႁဵတ်းၵၢၼ်ပၢႆးမၢၵ်ႈမီးယႂ်ႇလူင်ဢၼ်ၼိုင်ႈၼႂ်းမိူင်းမၢၼ်ႈ၊ မီးလွင်ႈၶဝ်ႈႁူမ်ႈၸွမ်းၼႂ်းၵၢၼ် ၵပ်းသိုပ်ႇၵပ်းသၢၼ်၊ ႁႅင်းၾႆးၾႃႉ၊ ႁႅင်းထၢတ်ႈ၊ ၵၢၼ်ၵႃႉၶၢႆတီႈလိၼ်၊ ၵၢၼ်ၵေႃႇသၢင်ႈ၊ ၵၢၼ်ပၢႆးၽုၵ်ႇသွမ်ႈလႄႈ ႁူင်းသဝ်းၸိူဝ်းၼႆႉ။ IGE ၼႆႉၵေႃႇတင်ႈမိူဝ်ႈပီ 1994 ၵေႃႉၵေႃႇတင်ႈပဵၼ် ၼႄႇဢွင်ႇလႄႈပျီႉဢွင်ႇ လုၵ်ႈၸၢႆးၸွမ် သိုၵ်းလူင် ဢွင်ႇတွင်း ၵေႃႉယၢမ်ႈပဵၼ်ၽွင်းလူင်ၽၢႆႇႁူင်းၸၢၵ်ႈ 1 ပႃႈတႂ်ႈလူင်ပွင်ၸိုင်ႈသိုၵ်းမၢၼ်ႈၼဢၽ။ ၼႄႇဢွင်ႇၼႆႉ ပဵၼ်ႁူဝ်ပဝ်ႈ IGE ယၢမ်းလဵဝ်။

IGE Group ၼႆႉပဵၼ်ၽူႈႁူမ်ႈၵၢၼ်ၵၼ်တင်းၶွမ်ႇပၼီႇၶႄႇလႄႈထႆးၼႂ်းပိုၼ်ႉတီႈလၢႆလၢႆဢၼ် ၽႅၼ်ၵၢၼ်သၢင်ႈၽၢႆ ၼိူဝ်မႄႈၼမ်ႉၶူင်း၊ ပိူင်လူင်မၼ်းပိူဝ်ႈတႃႇဢဝ်ႁႅင်းၾႆးၾႃႉသူင်ႇဢွၵ်ႇၼွၵ်ႈမိူင်း- ၽၢႆသွင်ဢၼ်ၼႂ်းမိူင်းတႆး ၽၢႆ ၼွင်ၽႃ ႁႅင်းၾႆးၾႃႉ 1,200 မႄႇၵႃႇဝတ်ႉ (ၸွမ်းၶွမ်ႇပၼီႇ Hydrochina) လႄႈၽၢႆမိူင်းတူၼ် ႁႅင်းၾႆးၾႃႉ 7,000 မႄႇၵႃႇဝတ်ႉ (ၸွမ်းၶွမ်ႇပၼီႇ China Three Gorges Corporation, Sinohydro/Powerchina and the Electricity Generating Authority of Thailand or EGAT) လႄႈထႅင်ႈဢၼ်ၼိုင်ႈပဵၼ်ၽၢႆၼႂ်းမိူင်းယၢင်းၽိူၵ်ႇ ၽၢႆႁတ်ႉၵျီး ဢၼ်မီးႁႅင်းၾႆးၾႃႉ 1,365 မႄႇၵႃႇဝတ်ႉ ၼိူဝ်မႄႈၼမ်ႉၶူင်း (ၸွမ်းၶွမ်ႇပၼီႇ Sinohydro/Powerchina and EGAT)။

IGE Power ၼႆႉမိူဝ်ႈဢွၼ်တၢင်းသႂ်ႇၸိုဝ်ႈပဵၼ် International Power Group (IPG)၊ ႁူမ်ႈပုၼ်ႈၵၼ်တင်း (IPGRB) ၼႂ်းပီ 2015 ၸွမ်းၶွမ်ႇပၼီႇ Razel-Bec ၶွင်ၾရင်ႇသဵတ်ႇ တႃႇလၵ်ႉသၢင်ႈၽၢႆ ယႄးယႂႃႇတွၼ်ႈၼိူဝ် ၼိူဝ်မႄႈၼမ်ႉ ၸိုင်ႈတႆးပွတ်းႁွင်ႇ။